Uppstillingarnefnd hefur lokið störfum vegna komandi aðalfundar félagsins og er ánægjulegt að greina frá því að framboð til stjórnar eru fleiri en þau sæti sem kjósa þarf um.
Ólíkt því sem oft áður hefur verið þurfti nefndin ekki að hvetja einstaklinga sérstaklega til framboðs. Að þessu sinni höfðu fleiri samband að eigin frumkvæði og lýstu yfir vilja til að taka þátt í starfi stjórnar. Það er afar jákvætt merki um kraft og áhuga innan félagsins.
Núverandi stjórn – ekki í kosningu:
Eftirfarandi sitja áfram í stjórn:
- Bjarni Freyr Þórðarson, félagsforingi
- Harpa Kolbeinsdóttir, ritari
- Dagný Lind Pálsdóttir, meðstjórnandi
Bjóða sig fram áfram til stjórnar
- Guðvarður Björgvin Fannberg Ólafsson, meðstjórnandi
- Kristján Ingi Þórðarson, aðstoðarfélagsforingi
(meðstjórnandi verði samþykkt lagabreyting) - Vilhjálmur Þór Vilhjálmsson, gjaldkeri
(meðstjórnandi verði samþykkt lagabreyting)
Ný framboð til meðstjórnenda
- Haukur Freyr Ólafsson, sveitarforingi í fálkaskátum
- Jónina Sigríður Grímsdóttir (Ninna), foreldri í fálkaskátum
Framboð til varamanna (og meðstjórnenda verði lagabreyting samþykkt)
- Bragi Reynisson, varamaður, býður sig fram áfram
- Jakob Heimir Burgel Ingvarsson, deildarforingi og formaður foringjaráðs
Framboðin endurspegla breidd og fjölbreytileika í starfi félagsins – þar mætast reynsla, ný sýn og sterkur vilji til að byggja áfram upp öflugt og metnaðarfullt starf. Það er dýrmætt að sjá bæði reynslumikla leiðtoga og ný andlit stíga fram og bjóða sig fram til ábyrgðar.
Aðalfundur er lýðræðislegur hjartsláttur félagsins. Þar tökum við sameiginlega ákvörðun um hver leiðir starfið næsta starfsár og mótum um leið stefnu og forgangsröðun til framtíðar.
Við hvetjum félagsmenn til að mæta, kynna sér framboðin og taka virkan þátt.
Kynningar frá frambjóðendum:
Kristján Ingi:
Ég heiti Kristján Ingi Þórðarson og bý í Laugardal í Reykjavík. Ég er í framboði til aðstoðarfélagsforingja hjá Skátafélagið Hraunbúar og hef gegnt þeirri stöðu frá miðju ári 2025. Ég hóf skátastarf árið 2007 og hef starfað sem sveitarforingi frá árinu 2015. Ég hef setið í stjórn félagsins sem meðstjórnandi frá 2022 og sem aðstoðarfélagsforingi frá 2025. Í gegnum árin hef ég komið að fjölbreyttum verkefnum, meðal annars umbunarferðum, skipulagningu viðburða, gjafamálum og nú síðast vinnu við uppbyggingu nýs skála. Utan skátastarfs starfa ég sem byggingartæknifræðingur á verkfræðistofu, þar sem ég sinni ráðgjöf í innivistarverkefnum. Menntun mín er húsasmiðameistari og byggingartæknifræðingur. Mér finnst sérstaklega gaman að ferðast og fara í útilegur með vinum og fjölskyldu, enda er útivist og samvera mikilvægur hluti af bæði skátastarfi og daglegu lífi.
Villi:
Ég heiti Vilhjálmur Þór Sigurjónsson og er alinn upp í Borgarnesi. Ég byrjaði í skátafélagi Borgarness og gekk síðar til liðs við Hraunbúa þegar ég flutti í Hafnarfjörð. Skátastarfið hefur gefið mér dýrmæta reynslu í samstarfi, áskorunum og útivist. Ég er einnig foreldri og eiginmaður virkra félaga og því býð ég krafta mína fram til stjórnarstarfa.
Bragi:
Ég er 41 árs skáti úr Hafnarfirði sem hóf minn skátaferil 9 ára í Hraunbúum. Ég var mjög virkur innan félagsins sem barn og færði mig svo um set á unglingsárum og stofnaði meðal annars Tækniskáta, lítið skátafélag skáta af höfuðborgarsvæðinu sem höfðu dálæti af tækni í skátastarfi. Ég kom aftur inn í stjórn 2008 og starfaði í tvö ár sem aðstoðar félagsforingi og fór meðal annars sem sveitarforingi Hraunbúa á Alheimsmót skáta í Englandi. Þegar strákarnir mínir komu inn í Hraunbúa árið 2023 steig ég aftur inn í stjórn sem virkur varamaður og hef verið þar hluti af stjórn bæði Hraunbúa og Ferðbúans síðan. Undanfarin ár hef ég því verið einn af fulltrúum foreldra í stjórn Hraunbúa. Í dag starfa ég með þrem stjórnun, Skátafélaginu Hraunbúum, Björgunarsveit Hafnarfjarðar og Ský sem meðal annars heldur UT-Messuna í Hörpu ár hvert. Í dag er ég á milli starfa en er að færa mig úr stöðu Forstöðumanns tæknirekstrar hjá Ljósleiðaranum í starf Framkvæmdastjóra Gaflara Rafverktaka.
Ég er menntaður Rafvirki en lauk einnig námi viðTækniteiknun, stúdent og B.S. gráðu í Viðskiptafræði. Þessi misserin stunda ég nám við Meistaraskóla rafiðnaðar og stefni á útskrift sem Rafvirkjameistari vorið 2027.
Haukur:
Hæ öll! Ég heiti Haukur Freyr og gef kost á mér í stjórn Hraunbúa fyrir komandi starfsár. Skátastarfið hefur mótað mig mikið í gegnum tíðina og mig langar að leggja mitt af mörkum til að halda áfram að byggja upp öflugt og skemmtilegt starf fyrir félagið okkar. Ég byrjaði sjálfur í drekaskátum og hef verið stanslaust síðan, eða í um 11 ár. Reynsla mín innan félagsins: • Foringjastörf: Ég starfaði sem aðstoðarforingi í drekaskátum í tvö ár og færði mig svo yfir í fálkaskátana. Eftir stutta pásu sneri ég aftur af fullum krafti í ársbyrjun 2024 og tók svo við sem sveitarforingi í fálkaskátum síðastliðið haust, þar sem ég starfa enn. • Viðburðir: Á síðasta vormóti fékk ég það skemmtilega verkefni að vera mótsstjóri. Það var krefjandi en ótrúlega lærdómsríkt að stýra flottum hópi úr rekkaskátunum við skipulagninguna. Ég er mjög þakklátur fyrir allt sem Hraunbúar hafa gefið mér í gegnum tíðina. Mér finnst spennandi tækifæri að fá að sitja í stjórn og hjálpa til við að gera félagið okkar enn öflugra og skemmtilegra fyrir næstu kynslóðir skáta.
Jakob:
Eg heiti Jakob, er 27 ára bakari hjá Bæjarbakarí. Hef lokið Gilwellþjálfun og er Spæta. Ég hef verið í skátunum í að ég held 19 ár. Starfað við hin ýmsu verkefni. Ég byrjaði sem Fossbúi sem barn og var þar í 15 ár, þar af 7 sem foringi og 5 í stjórn. Eg færði mig yfir í Hraunbúa haustið 2021 og hef starfað sem foringi síðan þá. Fyrstu þrjú árin sem fálkaskáta foringi og núna sem deildarforingi Dróttskáta. Ég hef einnig starfað sem formaður félagsráðs og sit sem áheyrnarfulltrúi á stjórnarfundum. Núna sit ég í fararstjórn Landsmóts skáta þar sem við erum stærsta íslenska félagið og verð sveitarforingi á Jamboree 2027. Einnig sat ég sem dagskrárforingi Skátafélagsins Vífils í tvö ár 23-25.
Ninna:
Jónína Sigríður Grímsdóttir heiti ég oftast kölluð Ninna. Ég er spánýr skáti, lauk nýverið sjálfboðaliðanámskeiði á vegum BÍS og var svo heppin að ná að fara á Neista núna í janúar. Ég á einn fálkaskáta hérna í Hraunbúum og fylltist mikilli löngun að fá að vera með í starfinu í gengum hann. Konan mín var einnig í skátastarfi þegar hún var krakki, í Vífli, svo ég tók málin í mínar hendur og hætti að vera útundan. Ég hef setið í allskonar stjórnum í gegnum tíðina. Lengst af í stjórn Neistans styrktarfélags hjartveikra barna og fullorðina, en einnig í stjórn Q félags hinsegin námsmanna, starfsmannafélags 10-11 er búin að vera bekkjatengill í bekk sonar míns síðustu árin. Hef haldið utanum allskonar viðburði á vegum þessara félaga. Ég hef gaman af matseld, brasi og skipulagningu, hef unnið bæði í framreiðslu eldhúsi og framleiðslu eldhúsi. Núna vinn ég fyrir Neistann. Er skrifstofustjóri og sé um daglegan rekstur í samstarfi við stjórn félagsins.
Beggi:
Ég heiti Guðvarður Björgvinn Fannberg Ólafsson – líklega með næstlengsta nafnið í Skátafélaginu Hraunbúum – en flestir þekkja mig einfaldlega sem *Begga*.
Ég er giftur Hrefnu Sif Gísladóttur hjúkrunarfræðingi og saman eigum við fjögur börn á aldrinum 4–14 ára. Ég er fæddur 24. maí 1977 og verð því 49 ára á árinu. Í dag starfa ég sem ráðgjafi á upplýsingatæknisviði Arion banka og stunda jafnframt nám í húsasmíði á kvöldin – því það er alltaf gott að kunna bæði að byggja bæði framtíð og innviði.
Hraunbúi frá barnsaldri
Ég hef verið Hraunbúi frá því ég var krakki og skátastarfið í Hafnarfirði hefur fylgt mér alla tíð. Eftir nokkurra ára hlé um tíma aldamóta tók ég aftur virkan þátt í starfi félagsins og stofnaði sveitina *Tölvuálfa*, sem er enn starfandi í dag.
Ég sat í stjórn félagsins 2004–2006 sem ritari og tók árið 2006 við starfi *félagsforingja*, sem ég sinnti til ársins 2009. Það voru afar lærdómsrík ár sem mótuðu sýn mína á mikilvægi sterkrar stjórnar, skýrrar stefnu og góðs samstarfs innan félagsins.
Árið 2005 fékk ég *Gilwell-einkenni* og er í flokknum *Gaukum*. Sú þjálfun og tengslanet sem fylgdu Gilwell-náminu hafa reynst mér afar dýrmæt í leiðtogastarfi innan skátahreyfingarinnar.
Að loknu starfi félagsforingja tók ég að mér hlutverk gildismeistara St. Georgsgildisins í Hafnarfirði og síðar vara landsgildismeistara í eitt tímabil.
Mót, verkefni og þátttaka
Í gegnum tíðina hef ég tekið þátt í skipulagi og stjórnun fjölmargra skátamóta. Þar má meðal annars nefna:
– Mótsstjórn á fyrsta EuroMiniJam sem haldið var á Íslandi
– Mótsnefnd Roverway 2009 þegar það var haldið hérlendis – Mótsnefndum Vormóta Hraunbúa
– Og ýmis önnur verkefni í þágu skátastarfsins Skátastarfið hefur alltaf verið fyrir mér meira en fundir og mót
– það er samfélag, uppeldi og vettvangur til að efla ungt fólk til ábyrgðar og sjálfstæðis.
Stjórnarseta og framtíðarsýn
Frá árinu 2021 hef ég setið í stjórn Skátafélagsins Hraunbúa og gef nú kost á mér til áframhaldandi stjórnarsetu.
Fram undan eru stór og mikilvæg verkefni sem munu móta starf félagsins til framtíðar. Þar má nefna:
– Uppbyggingu nýs skála sem verður hjarta félagsstarfsins næstu áratugi
– Varanlega og trausta lausn fyrir tjaldsvæði bæjarins sem félagið rekur
– Markvissa styrkingu innviða og skýra langtímasýn fyrir starfsemi Hraunbúa
Þetta eru verkefni sem krefjast ábyrgðar, festu og góðrar samvinnu. Ég tel að reynsla mín af fyrri stjórnarsetu, félagaforingjastarfi og verkefnastjórnun nýtist vel í þeirri vegferð. Ég er tilbúinn að halda áfram að vinna af heilindum að því að tryggja félaginu traustan grunn og skýra stefnu til framtíðar. —
Lokaorð
Hraunbúar eru ekki bara félag fyrir mig – þeir eru hluti af minni sögu, mínu uppeldi og mínu samfélagi. Ég vil áfram leggja mitt af mörkum svo félagið okkar standi sterkt, öruggt og metnaðarfullt til framtíðar. Ég óska eftir stuðningi ykkar og atkvæði á komandi aðalfundi.
Recent Comments