FYRIR 8-9 ÁRA BÖRN, FÆDD 2014 – 2015
Fundir eru einu sinni í viku og val er á milli mánudaga eða miðvikudaga klukkan 17:30-18:30. Fyrsti fundur verður haldinn 28. ágúst 2023.
Rauðúlfar
Fundir:Mánudaga kl. 17.30-18:30
Sveitarforingjar: Brynhildur og Kristjana
Grábræður
Fundir: Miðvikudaga kl. 17.30-18:30
Sveitarforingir: Thelma Líf
Starf drekaskáta
Glaðværð, ákefð, forvitni.
Ung en stórhuga fá drekaskátar tækifæri til að spreyta sig og uppgötva
hvers þau eru í raun megnug.
Skátarnir fást við margvísleg viðfangsefni og einbeita sér að mestu leyti að leikjum og skemmtilegum verkefnum sem styrkja ýmsa dýrmæta eiginleika svo sem traust, þolinmæði, samvinnu, samkennd og sjálfsbjargarviðleitni. Á þessum yngstu árum í skátastarfi öðlast skátarnir grunn í allskyns færni sem þau skerpa enn fremur á efri aldursbilum. Þrátt fyrir ungan aldur eru skyndihjálp, útieldun, rötun, náttúruvitund og útivera í ýmsum aðstæðum á meðal þess sem drekaskátar fá að reyna.
Vikulegir fundir drekaskáta
Yfir starfsárið hittast drekaskátar vikulega í skátaheimilinu. Dagskráin er fjölbreytt yfir árið en tekur iðulega mið af áhuga og getu hópsins ásamt árstíð hverju sinni. Á þessum vikulegu fundum kynnast skátarnir sífellt betur og öðlast smám saman færni til að takast á við stærri áskoranir.
Viðburðir
Drekaskátar fara gjarnan í styttri ferðir og útilegur með sínu skátafélagi en taka síðan þátt í hluta af lengri ferðum með eldri skátum félagsins s.s. félagsútilegum og skátamótum þar sem þau upplifa hvað bíður þeirra á efri aldursbilum skátastarfs. Á vegum Bandalags íslenskra skáta, landssamtaka skátafélaganna, eru árlega haldnir tveir viðburðir fyrir drekaskáta; Drekaskátadagurinn og Drekaskátamótið.
Innan Hraunbúa fá Drekaskátar einnig að kynnast því hvernig er að gista annarsstaðar en heima á gistinótt, og taka þátt í Vormóti Hraunbúa að vori til ásamt öllum öðrum skátum félagsins.
